Сиз севган ширинликлар қандай пайдо бўлган

Ширинликларни хуш кўрмайдиган инсон бўлмаса керак. Бугун кўпчилик севиб истеъмол қиладиган десертларнинг яралиш тарихига тўхталамиз. 

МАКАРОН

Тухум оқи, шакар ва бодом унидан тайёрланадиган мазкур ширинлик, баъзи маълумотларга қараганда, Италияда уйғониш даврида , бошқа маълумотларга кўра эса, Францияда, XVI асрда Екатерина Медичи томонидан Апеннин ярим оролидан келтирилгач пайдо бўлган.Нима бўлганда ҳам, аввал бошда мазкур ширинлик ўртасида крем ёки мураббо билан ёпиштирлмаган, оддий печенье кўринишида бўлган. Ҳозирги кунга келиб қандолатчилар бор фантазияларини ишга солиб, турфа хил крем ва қиёмлар билан тўлдирмоқдалар.

ЭКЛЕР

Десерт XIX аср бошида ошпаз Мари-Антуан Карем шарофати билан дунёга келган. Ҳозирги кунда барчага таниш бўлган қайнатилган хамирдан тайёрланадиган ширинликни айнан у ўйлаб топган. Ширинлик француз амалдорлари томонидан жуда севиб истеъмол қилинган ва яшин тезлигида еб қўйилган. Айнан шунинг учун унга «эклер» номи берилган бўлиб, бу сўз французчадан чақмоқ маъносини англатади. Қизиқарли томони, мукаммал эклернинг узунлиги 14см бўлиб, унинг креми ҳам хамири сингари қайнатилган бўлиши керак.

ТИРАМИСУ

Гарчи италияликлар мазкур ширинлик  XVII асрда ширинликсевар Козимо III Медичининг Сиеннага ташрифи шарафига яратилганлигини иддао қилсаларда,  аслида тирамису 1960-1970 йилларда қанолатчиларнинг тажрибаси натижасида пайдо бўлган. Калорияга бой ва таркибида қаҳва бўлган ширинлик, италянчадан таржима қилганда «мени тетиклаштир» деган маънони англатади.

БЕЗЕ

Безе (ёки меренга) тайёрланиши жуда ҳам содда бўлган ширинликлардан ҳисобланади. Унинг пайдо бўлишига доир икки хил афсона мавжуд. Бирига кўра: уни Швейцариядаги Майринген шаҳрида яшаган қандолатчи тайёрлаган, меренга номининг келиб чиқиш сабаби ҳам шу, иккинчи ҳикояга ишонадиган бўлсак, безенинг ватани Франция бўлиб, французча baiser (бўса) сўзидан келиб чиққан. Айнан мазкур  давлатда ушбу ширинликнинг биз учун одатий бўлган тайёрланиш усули Франсуа Массиалнинг XVII  асрда чоп этилган ошпазлик китобида қайд этилган.

ШОКОЛАД ПЛИТКАСИ

Майя ҳиндулари ва ацтеклар узоқ вақт давомида қовурилган ва янчилган какао донига сув аралаштириб тайёрланган яҳна ичимлик истеъмол қилишган. У тахир ва жуда озуқавий бўлган. Мустамлакачилар бу ичимликни Европага олиб келиб, уни ширин қилдилар.  XIX  аср бошларида голландиялик Конрад ван Гутен  какао мойи ишлаб чиқариш технологиясини патентлади, шу аср охирида эса қуруқ сут қўшиб, сутли шоколад плиткалари ишлаб чиқариш йўлга қўйилди.

ЧИЗКЕЙК

Агар мазкур ширинлик пайдо бўлганига кўп бўлмаган деб ўйласангиз, адашасиз. Қадимий Мисрни чизкейкнинг ватани десак ҳам бўлади. Айнан ўша ерда илк маротаба творогли пирог тилга олинган. У даврларда маълумотларга кўра, озуқавий қиймати юқори бўлган ширинлик спортчилар томонидан истеъмол қилинган. Кейинчалик Рим, сўнгра Англияга етиб борган ширинлик, айнан Америка Қўшма Штатларида катта машҳурликка эришган. Америкда мазкур десерт қаҳвахоналар таомномасининг ажралмас қисмига айланган.

ПУДИНГ

Инглиз ошхонасининг асл тимсоли бўлган пудинг илк бошда ширинлик бўлмаган ва гўшт ва қуруқ мевалардан тайёрланган. Унинг мазкур кўриниши XVIII – XIX асрларгача сақланиб келган. Кейинчалик унга ёнғоқдан тортиб, шакаргача, Британия салтанатининг ҳар бурчагидан келтирилган турли масаллиқлар қўшила бошлаган. Шу сабабли у мамлакат қудрати тимсоли ҳисобланган.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.