Олтин даврим талабалар ҳақидаги ўзбек телесериали

Сценарий муаллифи Исмоил Шомуродов сўзларига кўра, сериал сценарийсига Ўзбекистон ОТМларидаги ўқитиш тизими, баҳолаш мезонлари, устозларнинг талабалар ҳақидаги фикрлари  асос бўлган. Сериал мақсади ёшларни ўқишга, билим олишга қизиқтиришдан иборат.

“Олтин даврим” телесериалининг режиссёри Фахриддин Шамсиматов айтишича, тасвирга олиш ишлари 2013 йил декабр ойида бошланиб, шу йилнинг май ойигача давом этган. Табиат билан боғлиқ саҳналар Тошкент шаҳри ва вилоятида, қолган барча эпизодлар “Ўзбекистон МТРК Медиамаркази” ДК павильонларида қурилган махсус декорацияларда суратга олинган. Суратга олишда сўнгги рақамли камералар, “Arrisun”, “DDlight” ёритиш ускуналари, мини кранлардан фойдаланилган.

Сериални тасвирга олиш жараёнларига 100 га яқин актёрлар, 30 дан ортиқ ижодий ва техник ходимлар жалб этилди. Яқин кунларда сериалнинг иккинчи ва учинчи фаслларини ҳам суратга олиш режалаштирилган.

Асосий ролларда Мирза Азизов, Боир Холмирзаев, Тоҳир Саидов, Муқаддас Холиқова сингари тажрибали актёрлар билан бирга Ўзбекистон давлат санъат ва маданият институти талабаларини ҳам кўриш мумкин.   

Сериалда 5 ўғил ва 5 қизнинг тақдир йўллари кўрсатилган. Воқеалар кириш имтиҳонларининг жавоби эълон қилинган нуқтадан бошланиб, талабалик бахтига эришган ва эришололмаган йигит-қизларнинг ҳаётига боғланиб кетади.


Манба: uz24.uz/uz

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.