«Оҳ, Салима, Салима!» фильми ёпиқ премьерасидан

10 март куни Алишер Навоий номли киносаройда режиссёр Нозим Тўлахўжаевнинг «Оҳ, Салима, Салима!» тўлиқ метражли бадиий фильмининг ёпиқ тақдимоти бўлиб ўтди.

Тақдимотда фильм ижодкорлари, соҳа мутахассислари ҳамда журналистлар қатнашди.

Сценарий муаллифи Элмира Ҳасанова, картина оператори Жасур Шаметов.

Картинада асосий ролларни Шаҳзода Матчанова, Адиз Ражабов, Акбархўжа Расулов, Санжар Маткаримов ва Азиза Бегматовалар ижро этган.

Картина романтик комедия ва мелодрама жанрида суратга олинган.

Фильмнинг қисқача сюжетига тўхталадиган бўлсак, картинада Салима исмли икки қизнинг бир-бирига туташган тақдири ҳақида ҳикоя қилинади. Бир хил кўриниш, бир хил исм эга бўлган бу қизларнинг ҳарактерлари икки олам. Бири бойвачча инсоннинг якка ёлғиз, эртакойи бўлса, кейингиси оддий оиланинг содда қизи. Ҳаётнинг турли синовлари инсонларнинг юриш туриши-ю ҳарактерига ҳам жиддий таъсир ўтказар экан. Бу ғоя фильмда яққол ўз аксини топган. Қайсар, шаддод ва қўпол шаҳарлик қиз тақдир тақазоси билан чекка бир қишлоққа келиб қолади. Параллел равишда вилоятдан шаҳарга келган бошқа ўқитувчи қизнинг воқеаси ҳам авж олади. Турли-туман воқеаларни бошидан кечирган икки қиз тақдири нима билан якун топишини эса 19 мартдан бошлаб юртимиз кинотеатрларида фильмни кўриб, билиб олишингиз мумкин.

Бадиий фильм ҳақида қисқача режиссёр Нозим Тўлахўжаев фикри:

— Картинанинг съёмка жараёнлари қанча вақт давом этди?

— Ўн кун ичида фильмни тўлиқ суратга олиш ишларини ниҳояладик.

— Фильм қайси ҳудудларда суратга олинди?

— Тошкент шаҳри ва Бука туманида.

— Нима учун филм номи айнан «Оҳ, Салима, Салима!». Сизда бошқа вариантлар ҳам бўлдими?

— Йўқ вариантлар бўлмади. Сабаби картина Салима исмли қизларнинг тақдирига бағишланган. Гувоҳи бўлганингиздек, бир-биридан тубдан фарқ қилувчи икки қиз. Фильм бошидан охиригача шу қизларнинг саргузаштлари ҳақида бўлади. Шунинг учун ҳам картина номи шунақа.

Эслатиб ўтамиз, фильмнинг жамоатчилик учун очиқ премьераси 19 март куни Алишер Навоий номли киносаройда бўлиб ўтади.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.