Муниса Ризаеванинг мусиқий тўплами тақдимотидан

Эстрадамизнинг ёрқин хонандаси Муниса Ризаева 22 март куни ижоди ихлосмандлари ҳукмига янги мусиқий тўпламини тақдим этди. 

Тақдимот, анъанага кўра Discovery медиа дўконида бўлиб ўтди. Ушбу куни бошловчилик вазифаси Даврон Кабулов зиммасида бўлди. Шинам ва кичик медиа дўкон хонанданинг мухлислари, фан клуби аъзолари, яқин дўстлар ОАВ вакиллари билан тўлиб кетди. 

Ушбу мусиқий тўплам хонанда ижодида учинчиси бўлиб, Муниса Ризаеванинг таъкидлашича, барча қўшиқлар юракдан яралган бўлганлиги боис «Юрак» деб, номланган. Шунингдек, хонанда ушбу мусиқий тўпламдан жой олган «Ватан» қўшиғи унинг учун ўзгача бир аҳамиятга эга эканлигини ҳам айтиб ўтди. 

Мусиқий тўпламда 24та тарона ўрин олган бўлиб, яхши таниш қўшиқларни, янги ва Муниса Ризаеванинг муаллифлигида яралган «УНУТОЛМАЙМАН», «БИР ИМКОН», «ҚАЙЛАРДА» тароналарини тинглаш мумкин. 

Хонанданинг тақдимоти одатдагидек эмас, балки бир оз ўзгача тарзда ўтди. Ажойиб овоз соҳиби Муниса Ризаева ушбу куни ташриф буюрганлар учун созандалари билан бир қанча қўшиқларини жонли куйлаб берди. 

Муниса Ризаеванинг қўшиқлари жаранги остида эса, ташриф буюрган мухлислар орасида Даврон Кабулов эълон қилган танловнинг икки иштирокчиси, танлов шартларини бажариб турдилар. Танлов шартига кўра икки иштирокчи хонанданинг суратини чизишлари керак эди.

Энг яхши расм эгасига эса, хонанда томонидан совға ҳадя этилиш ваъда қилинди. Икки иштирокчи бу ишни қўлларидан келганча амалга оширдилар ва ўзларининг севимли хонандаларининг шахсан ўзидан дасхат билан совғаларни қўлга киритдилар. 

Шу куни Муниса Ризаева ижросида шўх қўшиқлар ижро этилди, эсдалик учун суратларга тушилди, тақдимот ҳуш кайфиятда ўтди. 

Хонанда ва мухлислар самимий учрашувдан ёқимли таасуротларга эга бўлишди. Ахир мухлис ҳам, ижодкор ҳам меҳрли учрашувларга, мулоқотларга муштоқ бўлади доим. 

 

 

 

 

 

 

 

 

 

 

 

 

 

 

 

Азизлар демак, Муниса Ризаеванинг «Юрак» деб номланган мусиқий тўпламини пойтахтимизда жойлашган Discovery медиа дўконлари тармоқларида ҳарид қилишингиз мумкин. 

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.