Рафет Эл Роман Ўзбекистон ва ўзбек халқи ҳақида

29 август куни «Истиқлол» саҳнасида турк эстрадаси юлдузи Рафет Эл Роман тошкентлик мухлисларига илк концерт дастурини тақдим этди. Рафет Эл Романнинг кўтаринки руҳда ўтган концертидан сўнг хонанда билан суҳбатлашдик.

- Ўзбекистонда сизни энг таъсирлантирган нарса нима бўлди?

- Ўзбекистонда мени энг таъсилантирган нарса сизларнинг самимиятингиз, ўлкангизнинг гўзаллиги, саришталиги, таомларингиз, мусиқангиз, меҳмондўстлигингиз бўлди. Ишонинг, кўп давлатларда бўламиз, турли ўлкаларда концертлар берамиз ва шуни бутун қалбим билан айта оламан, ўзбек халқидаги самимийликни мен ҳали ҳеч қаерда кўрмадим. Бу учрашув бир умр ёдимда қолади ва умид қиламанки, сиз ҳам унутмайсиз.

- Самарқандда бўлиб ўтган «Шарқ тароналари» XI Халқаро мусиқа фестивалининг тантанали очилиш маросимида иштирок этдингиз. Шу ҳақда фикрларингизни билдирсангиз.

- Мазкур фестивалга халқаро миқёсдаги санъаткорлар ташриф буюрган. Барчамиз қатнашдик, қўшиқлар куйладик, санъаткорлар билан танишдик. Барча-барчаси муҳташам эди. Бу гўзалликларни барчага таърифлаш керак. Ишончингиз комил бўлсин, юртимга қайтганимда барча билан баҳам кўраман.

- Таомларимиздан татиб кўрибсиз. Энг ёққани қайси таом бўлди?

- Оҳ, бир палов едик, бир палов едик, мазаси оғзимизда қолди. Еб, тўймадик! Муҳташам ошхонангиз бор. Жуда бой маданиятингиз бор.

- Ўзбек санъаткорларидан кимларни танийсиз?

- Бир қатор ўзбек санъаткорлари билан алоқа ўрнатдик. Яқин келажакда ўзбек ва турк санъаткорлари бирликда ажойиб ижод намуналари яратамиз деган умиддаман.

- Ўзбек ва турк халқи ўртасидаги ўхшашликлар ва фарқларни сездингизми?

- Ўзбек ва турк халқи қардош халқ ҳисобланади. Ўхшашлик демайлик. Ўхшашлик йўқ. Биз бир тану, бир жонмиз, қардошмиз. Икки алоҳида давлат бўлишимизга қарамай, бир миллатмиз. Бир умматданмиз. Шунинг учун ўхшашлик сўзини ишлатмай қўяқолайлик. Фарқли тарафларга келадиган бўлсак, шахсан мен ҳеч қандай фарқ сезмадим. Шундай ўхшаш халқмизки, ўзингиз ўйлаб кўринг, бугунги концертда ҳам ҳаммангиз биргаликда менинг қўшиқларимга жўр бўлдингиз. Юртингизда кўп жойларда бўлдим ва қаерга бормай жуда илиқ кутиб олиндим.

- 20 йилдан ортиқ қўшиқ ёзасиз, нималардан илҳомланасиз?

- Кўпинча ишқ, айрилиқ бўлган. Севиб, унга етиша олмайсан, ошиқ бўласан, қалбинг яраланади, мажнунга айланасан ва бу сенга илҳом бағишлайди. Лекин ҳар доим эмас. Албатта барча қўшиқларимни бошимдан кечириб ёзмадим. Кўпинча «Қўшиқларингиз ўз ҳаётингиздан олинганми?» деган савол беришади, йўқ ҳаммаси ҳам эмас. Сизнинг ҳаётингиздан, сизнинг ўзингиз сўзлай олмаган туйғуларингизни намуна қилиб, сизларнинг тилларингиздан қўшиқ ёзиб, вақти келганда дардингизга қўшиқларим билан малҳам бўлиб, кўнглингизга кира олган бўлсам, мендан бахтли одам йўқ.

-  Жуда машҳур санъаткор бўлишингизга қарамай «юлдузлик касали»га чалинмагансиз, буни сири нимада?

- Илк қўшиғим чиққанда отам ёнига бориб: «Ота, кўряпсизми, менинг қўшиғимни бутун Туркия тингламоқда. Мен уддасидан чиқдим»,- дедим. Шунда отам: «Ўғлим, сени бутун дунё тинглаши мумкин, лекин ҳар доим камтар бўл, камтар бўлсанг сени инсонлар севади, агар димоғдор, ўзини яхши кўрган, бурни ҳавода бўлган инсонга айланган кунинг қандай юқорига кўтарилган бўлсанг, шундай пастга тушасан», - деди. Шу сабабдан буни унутмаслигимиз керак. Ҳаммамиз ҳам инсонмиз. ҳар доим виждонли бўлиб, яхши инсонларга эргашайлик, чунки ёмон инсонларга ерда ўрин йўқ, улардан бизга фойда йўқ. Дунёда уруш бўлаётган мамлакатлар қанча, оч болалар, айрилиқлар. Инсоннинг саноқли умри бор, менимча ҳаётини гўзалликлар, ҳузур ичида кечириш керак.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.