Шаҳзоданинг самимий руҳдаги концерт дастуридан

5 май куни «Истиқлол» санъат саройида ўзбек эстрдасининг мафтункор хонандаларидан бири Шаҳзоданинг концерт дастурига старт берилди. Янги тароналар, жозибали декорациялар, тирик афсона Фаррух Зокиров билан дуэт, нафис ҳаракатлар ва кўринишларнинг барчаси хонанданинг бу йилги шоу дастурида.

Жозибали ва доим нафислик тарк этмайдиган хонанда Шаҳзода бу йилги концертини «Дежавю» таронаси билан бошлаб берди.

Саҳна декорацияси оддий аммо дид билан безатилган бўлиб, марказда катта тўртбурчак экран ўрнатилган, ёнларида кичикроқ экранлар ва зинапоялар ўрнатилган. Марказдаги экран алвон парда билан безалган бўлиб, у очилганда ҳар бир қўшиққа монанд видео кетма-кетликлар намойиш этилди. Концерт Круглова Татьяна режиссёрлигида тайёрланган. Хонанда бир ўша парда орасидан чиқар, бир ғойиб бўлар эди.

3 қисмдан иборат концерт дастурида 21та тарона ижро этилди. Мазкур қўшиқлар орасида янгилари ҳам ўрин эгаллади.

Love you, «Розиман», «Люлю-Люли», MY ANGLE, «Хабиби», «Румба» каби композицияларни мухлислар илк бор тингладилар. Барча ижро этилган тароналар ва саҳна кўринишлари юракдан муҳаббат ила куйланди. 

Ҳаммага манзур бўлишга улгурган тарона «Хаста», 102-махсус интернат мактаби тарбияланувчилари иштирокида тақдим этилди. Улар тилларидан эмас, дилларидан «Хаста» клипидаги сюжетдан лавҳани намойиш этишди.

Хонанда «Минг шукур» қўшиғини куйлар экан, уни 9 май – Хотира ва қадрлаш кунига бағишлаб, яна бир бор барчаси учун шукроналар келтирди.

Шаҳзоданинг ижросидаги янги «Румба» таронаси жуда ҳам рақсбоп ва кайфиятни кўтарувчи тароналардан бири бўлди десак муболаға бўлмайди. Уни ижро этар экан, зинапоялар орқали кўкларга кўтарилди.  

«Куёв ва келинчак» таронаси жаранг сочганда саҳнага қўлларидаги гуллари билан келинчаклар образидаги раққосалар чиқишди ва қўшиқ сўнггида залдаги мухлисларга қарата келин гулдастасини улоқтирдилар.

Концертнинг энг ажойиб онлари, яъни кульминацион нуқтаси бу саҳнага Ўзбекистон Халқ артисти Фаррух Закиров чиққанлари бўлди. Биргаликда ижро этган тароналари «Чинара» янграр экан зал янада жонланиб, мухлислар зални телефонларидаги чироқлари ёғдусига тўлдирдилар.

Қўшиқ тугагач устоз санъаткор мазкур манзара учун миннатдорчилик билдириб, мухлислардан яна бир бор зални чироқлар ёғдусига тўлдиришни сўрадилар ва бу онларни ўзларининг телефонларига эсдалик учун мухрлаб қўйдилар. Ушбу дақиқалар видеолавҳамизда акс этган.

Шундан сўнг, хонанда Фаррух Зокировдан «Чойхона» тароналарини куйлашга ижозат сўради ва уни ижро этди.

Billionaire қўшиғини ижро этганда эса бутун залга «Ҳақиқий бойлик бу - қалб бойлиги», деган сўзлари ёзилган қоғоз парчалари ёғилди.

Концерт «Рахмат ҳаёт» таронаси билан якунланди.

Доим шукроналик ҳисси билан яшайдиган ва ижод қиладиган хонанда Шаҳзода, концертга ташриф бурганларга қалбдаги гўзаллиги-ю, меҳрини шукр ила улашди.  

Мазкур концерт дастурини ўзингиз кўришга ва ҳис этишга сизда имкон бор. Дастур ҳали 11 майга қадар давом этади.

Концертнинг илк кунидан барча суратлар бизнинг фотоҳисоботда. 

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.