Афросиёб поезди энди Бухорога ҳам қатнайди

Бугун Тошкент – Бухоро йўналишида «Афросиёб» юқори тезликда ҳаракатланувчи замонавий электр поездининг илк қатнови амалга оширилди.

Ўзбекистон Республикаси Президентининг  Бухоро темир йўлини электрлаштириш ва юқори тезликдаги йўловчи поездлар ҳаракатини ташкил этиш лойиҳасини амалга ошириш тўғрисидаги қарорга мувофиқ, апрел ойидан буён Самарқанд-Бухоро йўналишидаги мавжуд линия йўлларини реконструкция қилиш, янги пўлат изларни ётқизиш, ҳамда электрлаштириш ишлари амалга оширилди.

25 август куни ушбу лойиҳа тўлиқ ниҳоясига етказилиб фойдаланишга топширилди, ҳамда «Тошкент-Бухор» йўналишида «Афросиёб» юқори тезликда ҳаракатланувчи электр поездининг илк қатнови амалга оширилди.

Мазкур йўналишдаги темир йўлнинг узунлиги 259 километрдан иборат. Умумий қиймати  400 миллион АҚШ долларини ташкил этувчи ушбу лойиҳани амалга ошириш учун бор йўғи 16 ой вақт сарфланди.

Магистралнинг икки томонида деярли 500 километрдан зиёд масофага металл тўсиқлар ўрнатилди. Мазкур қурилишга 220 яқин замонавий техника жалб этилди.

Эски, кўримсиз вокзал ўрнида бугун замонавий, халқаро стандартларга мос, бир вақтнинг ўзида 300 нафардан зиёд йўловчига хизмат кўрсатишга мўлжалланган.

Шуни алоҳида таъкидлаш жоизки, бугунги кунгача йўловчилар Тошкентдан Бухорогача 600 километрдан ортиқ масофага темир йўл орқали 7-8 соатда етиб боришган бўлса, эндиликда 3 соату 20 дақиқада ўз манзилларига замонавий поездларда етиб олишлари мумкин бўлади. 

Манба: railway.uz

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.