iPhone X. Apple’дан узоқ кутилган янгилик

Бутун юзани қоплаган экранга эга юбилей телефони, сим картали соат, симсиз қувватланиш, 4К сифатли телемослама – буларнинг барчаси сўнгги “олмали”  тақдимотдаги янгиликлар. Энди эса бир бошдан ва батафсил.

Энг асосийсидан бошласак -  iPhone X.

Айнан Айфон Ўн, Икс эмас. У мазкур телефонлар яратилишининг ўн йиллиги муносабати билан ишлаб чиқарилди.

Асосийси – унинг олд қисмида одатдаги Home (Уйга) тугмачаси йўқ. Ва экран эндиликда бутун фронтал қисмни эгаллаган.  Диагонали 5,8 дюйм бўлиб, Plus версиялариникидан катта.

У Face ID функцияси билан жиҳозланган бўлиб, эгасининг юз кўринишини аниқлаш хусусиятига эга.

Бошингизнинг бир икки ҳаракати билан телефонингиз нафақат кечасию кундузи сизни таний олади ва фотосурат ёки эгизагингиздан ҳам ажрата олади, балки сизнинг юз ҳаракатингизга қараб анимоджи – анимациялаштирилган смайликлар ҳам яратиб бера олади.  

Жиддий функцияларга ўтиб, янги авлод телефонини янада тезроқ ва олдинги чипга нисбатан 25% сезгирроқ қилган янги X11 Bionic процессорини, OLED Super Retina дисплейини ва жуфтлаштирилган ва  реаллик билан тўлдирилган 12 мегапикселли камерасини қайд этишимиз керак. Фронтал камера катта миқдордаги датчик ва сканерлардан ташкил топган.

Яхшиси барчаси ҳақида аниқ ва қисқа видеони кўринг.

Ва яна бир узоқ кутилган “фишка” – симсиз қувватланиш. Бунинг учун энди айфонда шишали орқа панель мавжуд.

iPhone X сотувга 3 ноябрдан кумуш ва космик-кулранг рангларда 64ГБ версия (256ГБ версия ҳам бўлади) учун 999 доллар нарх билан чиқади.  Сотувга чиқиш вақтига келиб бошқа ранглар, ҳаттоки бронза рангида ҳам ишлаб чиқарилиши мумкин.

Шунингдек айфон 8 ва 8 Плюс намойиш этилди.

Қисқача – бу “еттинчи” ва янги Х ўртасидаги бир нарса: симсиз қувватланиш, янги процессор, оз-моз яхшиланган камера, ЛЕКИН эски экран ва одатий Home тугмачаси ва Face IDсиз.

8 учун нарх 699 доллардан бошланса, 8 Плюснинг нархи 799 доллардан бошланади. Сотувда 22 сентябрдан пайдо бўлади.

Учинчи серия янги Apple Watch тақдимотнинг яна бир “хит-мейкер”и.

Топ версиясида сим-карта  киритилган. Улар телефонсиз ишлай олади. Бутунлай.

Бу дегани барча хабарлар, қўнғироқлар, об-ҳаво ва бошқа маълумотлар тўғридан тўғри соатингизга келиб тушади. Ҳаттоки интернетдан тўғридан тўғри мусиқа тинглаш мумкин.

Мобил алоқа билан таъминланган модель нархи 399 доллардан бошланади. Турли моделларга эга: спорт, керамик ва Hermes маркасидан. Сотувда 22 сентябрдан. Биз учун энг катта камчилиги – улар мобиль алоқа операторлари томонидан созланиб улар томонидан қўллаб турилиши керак. Бизникилар рўйхатда йўқ.

Apple TV янги телемосламаси 4К видео сифати билан таъминланди. Эппл-симсторда шу стандартдаги фильмлар пайдо бўлди.

Булар мазкур тақдимотда намойиш этилган энг муҳим янгиликлар эди. Балки шу кузда янги флагман телефони ва янги айпад ҳамда компьютерлар ҳақида янада батафсил маълумот берадиган янги тақдимот кутаётгандир. Биз албатта маълумот берамиз.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.