Озодбек Назарбеков 2017 йилда концерт бермаслиги маълум бўлди

Ўзбекистон ва Қорақалпоғистон Халқ артисти Озодбек Назарбеков 2017 йилги мавсумда концерт бермайди. Бу ҳақда қўшиқчининг матбуот котиби Дилбаҳор Худойбердиева daryo.uz нашрига маълум қилган.

Қўшиқчининг матбуот котиби Дилбаҳор Худойбердиева: «Озодбек Назарбеков чиндан ҳам 2017 йилда концерт дастури бермайди, бу борада танаффус қилади», - деб гап-сўзларга ойдинлик киритган.

daryo.uz нашри мухбири томонидан, деярли бир ойга яқин вақт давомида мухлислари билан юзма-юз кўришишни одат қилган халқ артистининг тўсатдан бундай фикрга келишига сабаб нима, деб берилган саволга Худойбердиева шундай жавоб қайтарган:

«Назарбеков сўнгги йилларда тақдим этган концертларининг барчасида юз фоиз жонли ижрода куйлади, кучли босим билан меҳнат қилди. Бу эса ўз таъсирини кўрсатди, унда ҳам руҳий, ҳам жисмоний томондан толиқишлар бўлди».

Шунингдек, хонанданинг матбуот котиби Озодбек Назарбеков 15 декабрда «Ўзбекнаво» эстрада бирлашмаси томонидан ташкил этилган «Мавсум хитлари» концерт дастурида чиқиши бўлишига қарамай нега иштирок этмаганлиги ва икки кун ўтиб Туркманистонда концерт берганлиги сабабларига ҳам қуйидагича изоҳ берган:

«Мавсум хитлари тақдирлаш маросимида иситмаси кўтарилиб кетгани учун иштирок эта олмади. Бироқ Туркманистондаги концертга бориши олдиндан белгилаб қўйилгани учун, бетоб бўлишига қарамай уни ўтказиб қайтди».

Дилбаҳор Худойбердиеванинг таъкидлашича, Озодбек Назарбеков концерт беришдан танаффус қилган бўлса-да, ижод қилишдан тўхтамаган.

Ижод қилишдан чарчамаган ва тўхтамаган хонанда Озодбек Назарбеков янги йил арафасида мухлислари ҳукмига «Гуландоним» номли янги қўшиғини тақдим этди. 

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.