Сабина Мустаева ва Сардор Милано

Алишер Навоий номидаги миллий кутубхонасида иқтидорли Сабина Мустаева ва Садор Милано иштирокидаги матбуот анжумани бўлиб ўтди. Ушбу учрашувда бўлган суҳбатни эътиборингизга ҳавола этмоқдамиз.  


Сабина Мустаева – “Голос. Дети” (2 мавсум) лойиҳаси ғолиби. 2000 йилнинг 16 июнида Тошкентда таваллуд топган, 94-мактаб ўқувчиси. Қизалоқ лойиҳа ниҳоясига етгач уни дўстлари қандай кутиб олганликлари, синфдошлари билан муносабати ва ҳаётдаги мақсадлари ҳақида бўлишди. 


- Сабина, халқаро мусиқий лойиҳадаги муваффақиятдан сўнг ҳаётингиз қай даражада ўзгарди? 
Танловдан уйга қайтгач мен анча ўзгардим, босиқроқ бўлиб қолдим, жиддийроқ мавзуларда суҳбатлашишга, катталарга интила бошладим. Мисол учун авваллари созандалар билан суҳбатдан қочган бўлсам, ҳозир аксинча улар билан суҳбатлашиб, ўзим учун кўпроқ фойдали маслаҳатлар олишга ҳаракат қиляпман. Дўстларим кўпайди. Ўзим болалигимча қолдим, ўша ўша болаларча шўхликлар.   

- Финалдан сўнг сизни халқ қандай кутиб олгани ҳақида сўзлаб берсангиз. 
Тошкентга қайтиб келгач, ақлли қиз бўлиб мактабга боришни режалаштиргандим. Эртасига мактабга келиб шокка тушдим. Мени синфдошларим суратим тушурилган футболкаларда, сиёҳранг пуфаклар, гуллар билан кутиб олдилар. Мен ўз синфим ва мактабимни жуда яхши кўраман, қўллаб-қувватлаганликлари учун улардан миннатдорман. Бутун элимга, ва мен учун овоз берганларга ҳамда менга ишонганларга катта рахмат. Мен барчангизни яхши кўраман! 


- Дўстларингиз ва синфдошларингиз билан муносабатларингиз ўзгармадими?
Менинг синфдошларим – ҳудди ўзимга ўхшаган болалар. Бизларни фарқлаб турган ягона нарса бу – менинг танловда ғолиб бўлганим. Менинг улардан ҳеч қандай устунлигим йўқ, уларга паст назар билан қарашга ҳеч қандай ҳақим йўқ деб ҳисоблайман, умид қиламан мен “ҳаволаниб” кетмадим. Умуман олганда, ҳақиқий юлдуз “ҳаволаниб” кетишни ўзига эп кўрмайди, ҳаволаниб кетгани эса санъаткор эмас. Ҳар қанай ўзини ҳурмат қилган, эл назарига тушган одам мухлислари билан тил топишишга, оғир-босиқ бўлишга ҳаракат қилади. Мана масалан мен бажонидил кичкинтойларга дастхатлар тарқатаман, мен аввало ўзимни уларнинг ўрнига қўйиб кўраман – ёши катта кумирнинг ёнига бориб у билан мулоқотга киришиш осон эмас. Балки мен ҳам Сардорнинг ёнига бориб, ундан дастхат олишдан чўчиган бўлардим. Одамлар билан мулоқотда оддийлик керак, шунда улар сенга талпинишади. Албатта, сени бутун бошли Ўзбекистон қўллаб-қувватлаб турганини ҳис қилиш таърифлаб бўлмайдиган ҳиссиёт. Мени жуда кўплаб инсонлар қўллаб турдилар, биринчи навбатда улар менинг дўстларим, синфдошларим. Мен бу маъсулиятни ҳис қилдим.

  - Сиз ўз ижодингизни қандай баҳолайсиз ва энди санъатга қадам қўяётган мусиқачиларга қандай тилаклар билдирасиз?
Ўз чиқишларим видеотасвирини кўрганда ҳудди ўша дамдаги ҳиссиётлар чулғаб олади. Биргина нарса – бу ўша пайтда йўл қўйган хатоларимни кўра олишим ва улар устида ишлашим. Санъатга эндигина қадам қўяётган хонандаларга энг асосийси – мақсадлари сари интилишларини тилайман. Устоз хонандаларни кузатишларини, уларнинг муваффақияти, ҳиссиётларини кўра олишлари ва ўзлари учун энг керагини олишларини маслаҳат бераман. Доимо ўзларини устида ишлашсин, агар тайёр қўшиқни куйлаётган бўлсалар, ўша қўшиқнинг бошқа услубда куйланган вариантларини қидириб топиб, уларни ҳам тинглаб кўришни маслаҳат бераман. Муҳимиқўшиқни ҳис қилиш, юракдан куйлаш. 
 
- Орзуингиз?
Энг катта орзуим  - Элла Фицджеральд ёки Beyonce каби таниқли хонанда бўлиш. Ҳозир мен икки йўл ўртасида турибман: йўналиш танлашим керак, рок ёки джаз. Кўпроқ джазга интиляпман (бобом  - джаз саксофонисти) . Бундан ташқари, болаликдан орзуим “Грэмми” мусиқий премиясини қўлга киритиш.



Сардор Милано – «X-фактор. Главная сцена» танлови ғолиби. 1991 йилнинг 14 сентябрида Тошкент шаҳрида туғилган. Сардор бизга режадаги яккахон концерт дастури, оила қуриш ва медетацияга бўлган муҳаббати ҳақида сўзлади.  


- Опера билан қачондан бери шуғулланасиз ва бу санъат турини ўрганмоқчи бўлганларга қандай маслаҳат бера оласиз?
Мен опера билан бир неча йил аввал шуғулланишни бошлаганман ва тўғрисини айтадиган бўлсам, бу ҳақиқий мумтоз опера эмас, бакли кўпроқ унинг эстрадали кўриниши деса тўғри бўлади. Аммо опера билан жиддий шуғулланмоқчи бўлганлар, 18-20 ёшлардан кейингина тайёр бўладилар деб ўйлайман. Айниқса эркак кишининг овоз пардалари 27 ёшларга келганда тўлиқ шаклланади. Айнан шу ёш опера ижрочиси карьерасини бошлашнинг айни даври.  

    
- «X-фактор» лойиҳаси иштирокчиси бўлганингизда нималарни ҳис этганингиз ҳақида айтиб берсангиз. 
«Главная сцена»даги биринчи чиқишим олдидан, анча қийин бўлган даврни ўтказаётган эдим ва саҳнага чиқишдан олдин ўзимга "Буни ҳозир қилишим керак ёки бўлмаса, ҳеч қачон қила олмайман" деганман!". Мен ҳар ҳил ҳаяжонларсиз саҳнага чиқардим, чунки юртим шарафини муносиб тарзда тақдим этишим кераклигини ҳис этардим ва бу менга ёрдам берган. Аммо, тўғрисини айтадиган бўлсам, ғолиб бўла олишимга ишонмаганман, чунки менинг ижодим жуда ўзига хос ва уни қабул қилиш учун бунга тайёр бўлиш лозим. 

-Услубингизни ўзингиз ўйлаб топганмисиз ёки бўлмаса, бунинг устида ишлайдиган стилистлар борми?
Кийимни эътибор билан танлаймайман. Айниқса, саҳна либосларим менинг эскизларим бўйича дизайнер томонидан яратилади. "Главная сцена" лойиҳасидаги саҳна образларим продюсерим Константин Меладзе билан келишилган ҳолда яратилган. 

- Сиз учун биринчи ўринда нима туради: карьера ёки оила?
Ҳаётимизнинг мақсади бу - авлодимизнинг давом этишидир. Ҳозир менинг вазифам саҳнада бўлиш, санъатга ва ҳалққа ҳизмат қилишдир. Аммо вақти келиб мен, шубҳасиз оила қуриш учун тайёр бўламан. Фарзандларим менданда истеъдодли бўладилар, бироқ мен ўзимни жуда ҳам истеъдодли деб билмайман. 


- Ўзингизнинг яккахон концерт дастурингизга нималарни киритишни режалаштиргансиз? 
Дастуримизга жуда ҳам кўп нарсалар киритилиши режалаштирилган. Яккахон концерт дастуримда "Главная сцена" лойиҳасида айтилган ҳамма қўшиқларим жаранг сочади. Менинг ижройим Ёшлар cимфоник оркестри жўрлигида жаранг сочиши муносабати билан буткул ўзгача рангларда янграйди. «Queen» гуруҳи қўшиқлари шунингдек, «Barcelona» номери устида иш олиб бормоқдамиз, унда мен Фредди Меркьюри қўшиғини ижро этаман. Мен мухлислар концертдан мамнун бўлиб кетишларига умид қиламан. Ҳа айтганча, 27 ноябрда концертим бўлиши ҳақидаги маълумот ёлғон. Концерт бўлади, аммо ҳали кунни белгилаганимиз йўқ. Бироқ, менга кимдурлар шу концертга билетлар тарқатаётганликлари ҳақидаги миш-мишлар етиб келмоқда. Фирибгарларга ишонманг. 


- Сиз кўпгина тилларда қўшиқ ижро этасиз, ундан ташқари «Гладиатор» фильми учун ажойиб тилда саундтрек ҳам ижро этгансиз. Сиз нима деб ўйлайсиз, қўшиқ мазмун-моҳиятини етказиб бериш учун тилни билиш муҳимми?
«Гладиатора»даги қўшиқ менинг энг севимли қўшиқларимдан бири ва Ўзбекистонда у кўпчиликка манзур келганлигидан хабарим бор. Мен илк бор қўшиқни тинглаганимда, у менга нимадури билан она тилим ўзбекчани эслатди. Интернетда қўшиқ матнини изладим, ҳатто жамоам билан таржимонга мурожаат этдик. Биз бу тил ўйлаб топилганлигини билганимиздаги ҳайратимизни тасаввур қила оласизми! Албатта чет тилларини билиш муҳим. Нима ҳақда куйлаётганлигини билиш лозим. Шундай қўшиқлар борки, уларни ижро этганимдан кейин кучим қолмайди, чунки уларга ўзимни бағишлаб, энергия сарф қиламан. Шунинг учун менга концертдан аввал яхши ва мазали овқатланиб олиш муҳим. Шунингдек, чарчоқларимни чиқаришда, менга медетацияга бўлган қизиқишим ёрдам беради.