Тошкент мода ҳафталиги. 4-кун
Хитойлик дизайнер Xie Jiaqi нинг олами
Тошкент мода ҳафталигида Xie Jiaqi J.Queen & Little Queen (Қиролича ва кичик қиролича) тўпламини намойиш этди. Мазкур тўпламда 5 сетдан иборат либослар намойиш этилган бўлиб, илк маротаба баҳорда Пекин мода ҳафталигида тақдим этилган.
Тўпламда оқшом либослари, эркаклар ва аёллар учун либослар, шунингдек жажжи қизалоқлар учун либослар тақдим этилган.
Модельер тўр, шифон ва гипюр матоларидан, стеклярус ва тошлардан фойдаланган.
Узун шлейфли қизил оқшом либосига бурканган моделни йиғилганлар олқиш билан кутиб олдилар.
Дизайнер Xie Jiaqi Хитой мода саноати қўмитаси раиси ҳисобланади. J.Queen - бутун жаҳонга машҳур бренд бўлиб, Австрия Қироличаси Елизавета шарафига номланган.
Хитойлик дизайнер Wu Chuan Bao нинг коиноти
Дизайнер Wu Chuan Bao босиқ Casual-Chic аёллар ва эркаклар либослари тўпламини тақдим этди.
Ўз тўпламида модельер майин шифон ва зиғирни дағал ва оғир жун билан уйғунлаштирган.
Дизайнер Хитой мода оламида жуда ҳам ўзига хос ҳисобланиб, «инқилобчи» номини олган.
Шу билан бир қаторда «инқилобчи» дизайнер тўпламида классик услубдаги костюмлар ва пальтоларни кўриш мумкин.
Wu Chuan Bao жамият манфаати учун хизмат қиладиган дизайнер сифатида танилган бўлиб, кўп хайрия ишларига қўл уради.
«Мени #beyoung намойишида ёш ўзбек дизайнерларининг ишлари эътиборимни тортди. Келажакда ҳамкорлик қилишдан мамнун бўлардим».
Икки маҳаллий чеварларимиз Люба Султан ва Дина Сайфиларнинг фазоси
«Махалла-Шик» ёки «Сарпа-Шик» номли тўплам 40та эркаклар ва аёллар «лук»ларидан ташкил топган.
Тўплам намат ва бошқа матолар микси бўлиб, уларда хон атлас ва беқасам нақшлари кўзга ташланади.
Дизайнерлар мустақил бирликда фаолият олиб борадилар, лекин баъзан ижодий жуфтликда бирлашадилар.
Итальян мода олами билан дизайнер Maurizio Pecoraro таништирди
Дизайнер коллекцияси ўзига 15та тўлиқ Haute Couture «лук»ини жамлаган.
Тўпламда жаккард, трикотаж, вельвет каби матолардан фойдаланилган.
Итальян модельери ўзи кашф қилган йўл билан ўз қўллари ёрдамида матолар яратишни афзал кўришини тан олди.
Маэстро, Милан Дизайн Институтини тамомлагач мода олами маркази – Италияда ўз либослари брендини яратди.
«Менинг коллекциям аёллар учун – жасур ва кучли, тажриба ўтказишдан қўрқмайдиган, мавсумга боғланиб қолмаган аёллар учун яратилган».
Тошкент Мода ҳафталигининг тўртинчи кунидан фотосуратларни бизда томоша қилинг.
Мода ҳафталигининг учинчи куни эса мода шайдоларини икки ўзбек дизайнерлари Дилноза Умирзақова, ҳамда Дилноз Эркиноваларнинг муаллифлик ишлари намойиши билан шод этди.
ИЗОҲЛАР 0