DIYDOR театр-студияси спектакли халқаро фестивалда

Баҳодир Йўлдошев бошчилигидаги DIYDOR театр-студияси репертуаридаги «Қийиқ қизнинг қуйилиши» спектакли туркийзабон театрлар халқаро фестивалида иштирок этади.

23 майдан 30 майга қадар бўлиб ўтадиган «Туганлык» («Қардошлик») — туркийзабон театрлар халқаро фестивалида Бошқирдистон, Татаристон, Озарбайжон, Қозоғистон каби давлатлар билан бир қаторда Ўзбекистон ҳам иштирок этади. Унда жами 13та спектакль намойиш этилиб, Ўзбекистондан Ёқутистонлик режиссёр Сергей Потапов саҳналаштирган «Қийиқ қизнинг қуйилиши» спектакли танлаб олинган.

Шунингдек, фестиваль доирасида «Маданиятлар диалоги ва туркийзабон театр» Халқаро илмий-амалий анжумани ўтказилиб, анжуман материаллари асосида мақлоалар тўплами нашр қилинади.

«Туганлык» («Қардошлик») — туркийзабон театрлар халқаро фестивали  Бошқирдистон пойтахти Уфа шаҳрида 1991 йилдан бери ўтказилиб келади. Фестиваль  якунида «Энг яхши спектакль», «Энг яхши режиссёрлик иши», «Энг яхши аёл роли», «Энг яхши эркак роли» ва «Энг яхши сценография» каби 5та асосий номинациялар бўйича мукофотлар топширилади. Ундан ташқари, «Энг яхши бастакорлик иши», «Энг яхши драматургия», «Энг яхши иккинчи даражали роль» мукофотлари ва «Дебют», «Умид» каби совринлар топширилади.

Kunutun.uz нинг Telegram’даги расмий каналига обуна бўлиб, янгиликлардан кунутун хабардор бўлинг.